सर्प मित्रांच्या फलकांसह प्रतिबंधात्मक उपाययोजनांची मागणी
🔳 नवी मुंबई प्रतिनिधी 🔳 दि.२६ (सुरेश गायकवाड) :
नवीमुंबई मधील खारघर सेक्टर-११ येथील शिखर गृहनिर्माण सहकारी संस्था, प्लॉट क्रमांक २० समोरील रस्त्यावर अचानक साप आढळल्याने परिसरातील रहिवाशांमध्ये काही काळ भीतीचे वातावरण निर्माण झाले होते. साप दिसताच स्थानिक नागरिकांची धावपळ उडाली.
यावेळी स्थानिक रहिवासी सतीश भोसले, शैलेश देशमुख आणि महादेव हिमणे यांनी प्रसंगावधान राखत त्वरित सर्पमित्राशी संपर्क साधून त्यांची मदत मागितली. घटनास्थळी उपस्थित असलेले प्रतिष्ठित ज्येष्ठ आणि सर्वपरिचित डॉ. विजयकुमार बोरुडे यांनीही नागरिकांना सहकार्य करत मार्गदर्शन केले. पावसाळ्यात नाल्यातील पाण्याची पातळी वाढल्यामुळे साप व इतर सरपटणारे प्राणी सुरक्षित जागेच्या शोधात बाहेर येणे ही नैसर्गिक बाब असल्याचे त्यांनी सांगितले. तसेच नागरिकांनी घाबरून न जाता सापाला इजा करण्याचा प्रयत्न करू नये, सुरक्षित अंतर राखून त्वरित सर्पमित्र किंवा संबंधित यंत्रणेशी संपर्क साधावा, असे आवाहन त्यांनी केले.
दरम्यान, घटनास्थळी उपस्थित स्थानिक रहिवासी आणि जबाबदार नागरिक जितेंद्र बनसोडे यांनी खारघर सेक्टर-११ रेसिडेंट असोसिएशनच्यावतीने पनवेल महानगरपालिकेकडे प्रतिबंधात्मक उपाययोजना करण्याची मागणी केली आहे. विशेषतः नाल्यालगत व संवेदनशील ठिकाणी अधिकृत सर्पमित्रांचे संपर्क क्रमांक असलेले माहिती फलक लावण्यात यावेत, अशी त्यांनी विनंती केली.
याशिवाय महानगरपालिकेने नाल्यांची नियमित स्वच्छता, झुडपे हटविणे, जनजागृती फलक व सर्पमित्रांचे संपर्क फलक लावणे, तसेच पावसाळ्यात तातडीची बचाव यंत्रणा कार्यरत ठेवण्याची मागणी करण्यात आली आहे. पावसाळ्यात नागरिकांनी सतर्क राहून, साप आढळल्यास घाबरून न जाता किंवा त्याला पकडण्याचा प्रयत्न न करता, त्वरित सर्पमित्र अथवा संबंधित यंत्रणेशी संपर्क साधावा, असे आवाहन नागरिकांना करण्यात आले.