मुंबई : प्रतिनिधी
अनुसूचित जाती उपवर्गीकरणाच्या विरोधात २६ जून २०२६ रोजी मुंबईतील विधान भवन येथे आयोजित करण्यात येणाऱ्या महामोर्चाच्या पार्श्वभूमीवर दादर येथील डॉ. बाबासाहेब आंबेडकर भवन येथे महत्त्वपूर्ण नियोजन बैठक पार पडली. या बैठकीत चर्मकार विकास संघाने महामोर्चाला जाहीर पाठिंबा देत मोठ्या संख्येने समाजबांधवांनी सहभागी होण्याचे आवाहन केले.
बैठकीला भीमराव आंबेडकर आणि आनंदराज आंबेडकर यांची प्रमुख उपस्थिती होती. तसेच माजी समाजकल्याण मंत्री तथा आमदार राजकुमार बडोले, माजी समाजकल्याण मंत्री बबनराव घोलप, चर्मकार विकास संघाचे प्रदेशाध्यक्ष संजय खामकर, मुंबई प्रदेशाध्यक्ष सुभाष मराठे यांच्यासह विविध सामाजिक संघटनांचे पदाधिकारी उपस्थित होते.
यावेळी २६ जून रोजी होणाऱ्या महामोर्चाच्या यशस्वी आयोजनासाठी सविस्तर नियोजन करण्यात आले. महामोर्चाचे मायक्रो प्लानिंग करण्याबाबत एकमताने निर्णय घेण्यात आला. अनुसूचित जातीतील सर्व ५९ समाजघटकांची एकजूट कायम ठेवण्यासाठी तसेच न्याय आणि हक्कांसाठी सर्व समाजबांधवांनी मोठ्या संख्येने सहभागी व्हावे, असे आवाहन उपस्थित मान्यवरांनी केले.
मोर्चाच्या यशासाठी विविध संघटनांचे पदाधिकारी आपल्या कार्यक्षेत्रात जनजागृती मोहीम राबवत असून युवक, महिला, अधिकारी, कर्मचारी तसेच विविध क्षेत्रांतील समाजबांधवांचा सहभाग वाढविण्यासाठी व्यापक नियोजन सुरू असल्याची माहिती बैठकीत देण्यात आली.
चर्मकार विकास संघाचे महाराष्ट्र प्रदेशाध्यक्ष संजय खामकर आणि मुंबई प्रदेशाध्यक्ष सुभाष मराठे यांनी संघटनेतर्फे महामोर्चाला जाहीर पाठिंबा दर्शवित, चर्मकार समाजातील नागरिकांनी मोठ्या संख्येने मोर्चात सहभागी व्हावे, असे आवाहन केले.