वृक्षसंवर्धनासाठी राजर्षी छत्रपती शाहू महाराज फाउंडेशनचा पुढाकार

खारघर सेक्टर ११ मध्ये बोरवेलचे लोकार्पण

नवी मुंबई: सुरेश गायकवाड

नवी मुंबईतील पनवेल शहर, वाढत्या उन्हाळ्यामुळे आणि पाण्याच्या टंचाईमुळे खारघर सेक्टर ११ येथील श्री देवळेश्वर खेळाच्या मैदानातील वृक्षांचे संवर्धन करणे मोठे आव्हानात्मक बनले होते. स्थानिक रहिवासी, ज्येष्ठ नागरिक आणि महिला वर्ग स्वतः पाणी आणून झाडांना जीवनदान देत होते. या समस्येची गांभीर्याने दखल घेत राजर्षी छत्रपती शाहू महाराज फाउंडेशनने पुढाकार घेत पनवेल महानगरपालिकेकडे मैदानात बोरवेल मंजूर करण्याची मागणी केली होती.
फाउंडेशनचे संस्थापक विकास तांबे यांच्या सातत्यपूर्ण पाठपुराव्यामुळे आणि प्रयत्नांमुळे अखेर पनवेल महानगरपालिकेच्या खर्चातून मैदानात बोरवेलचे काम पूर्ण करण्यात आले. या उपक्रमामुळे मैदानातील शेकडो वृक्षांना नियमित पाणीपुरवठा होणार असून पर्यावरण संवर्धनाला मोठी चालना मिळणार आहे. तसेच “हरित खारघर” चे स्वप्न साकार करण्यासाठी हा उपक्रम महत्त्वपूर्ण ठरणार असल्याचे नागरिकांकडून सांगितले गेले.
फाउंडेशनचे सदस्य जितेंद्र बनसोडे यांनी सांगितले की, “राजर्षी छत्रपती शाहू महाराज यांच्या निसर्गप्रेमी विचारांपासून प्रेरणा घेऊन भविष्यातही वृक्षारोपण, वृक्षसंवर्धन आणि पर्यावरणपूरक सामाजिक उपक्रम सातत्याने राबविण्यात येतील.”
या उपक्रमाबद्दल परिसरातील नागरिकांनी समाधान व्यक्त करत फाउंडेशनच्या कार्याचे कौतुक केले. विशेषतः ज्येष्ठ नागरिक प्रदीप कांबळे, राजाराम माळी, सुनील म्हसकर, अशोक साळवी आणि नानासाहेब जाधव यांनी वृक्षसंवर्धनासाठी घेतलेल्या या पुढाकाराचे स्वागत केले.
कार्यक्रमास सकल मराठा समाज खारघरचे अध्यक्ष कालिदास देशमुख तसेच खारघर नगर रहिवासी संघ गणपती मंडळ, सेक्टर ११ चे अध्यक्ष सुनील भोईटे यांची विशेष उपस्थिती लाभली. तसेच सेक्टर ११ मधील ज्येष्ठ कार्यकर्ते अमित राणे आणि बापूसाहेब ढेंबरे यांनी फाउंडेशनने भविष्यातही अशाच समाजोपयोगी आणि पर्यावरणपूरक उपक्रमांचे आयोजन करावे, अशा शुभेच्छा व्यक्त केल्या.
याप्रसंगी सर्वांनी पनवेल महानगरपालिकेचे आयुक्त, संबंधित अधिकारी तसेच प्रत्यक्ष आणि अप्रत्यक्षरीत्या सहकार्य करणारे सर्व नागरिक, महिला वर्ग, ज्येष्ठ नागरिक आणि पर्यावरणप्रेमी यांचे मनःपूर्वक आभार मानले.
वृक्षसंवर्धनासाठी समाज आणि प्रशासन यांच्या संयुक्त प्रयत्नांचे हे प्रेरणादायी उदाहरण असून पर्यावरण रक्षणाच्या दिशेने उचललेले हे महत्त्वाचे पाऊल असल्याची भावना उपस्थितांनी व्यक्त केली.